Кемел Тоқаев мұражайында белгілі қазақстандық жазушы және журналист, Халықаралық «Алаш» әдеби сыйлығының лауреаты, Қазақстанның еңбек сіңірген қайраткері, «Құрмет» орденінің иегері Көсемәлі Сәттібайұлының “Жалғызқара” ғұмырнамалық-танымдық романының тұсаукесері өтті. Бұл кітабында қазақ детективінің көрнекті өкілі Кемел Тоқаев туралы жазған «Жалғызқара» ғұмырнамалық-танымдық романының бірінші кітабы. Қаламгер өз шығармасында Кемел Тоқаев өмірінің ашаршылық нәубетіне тап келген балалық шағы мен елге танымал жазушы боп, жапырақ жайған жасындағы басынан кешкен тауқыметі мол тағдырын домбыраның қос ішегіндей қатар шерте отырып, басты кейіпкерінің азаматтық ұстанымдарын суреткерлік көркем тәсілдермен шебер жеткізе білген. Кітаптың ерекшелігі – Кемел Тоқаевтың Қазақ КСР Жоғарғы Кеңесі Президиумының «Жаршы» журналында бас редактор боп қызмет істеп жүрген кезінде жазып қалдырған күнделігі мен детективші-қаламгердің ұлы Қасым-Жомарт Тоқаевтың Мәскеу Мемлекеттік Халықаралық қатынастар институтында оқып жүргенде және бұрынғы КСРО мемлекетінің ҚХР мен Сингапур елшіліктерінде тәжірибеден өткен жылдарында Алматы қаласында тұратын ата-анасына, бауырларына жазған сағынышты хаттары бар. Мұғалім Батен Даниярова көптеген жылдар бойы Кемел Тоқаевтың шығармашылығын зерттеумен айналысып келеді де Кемелтану факультативтік курсынан сабақ береді. Ол мектеп оқушыларына кітаптың қызықты бөліктері туралы айта отырып, оның төрт тарауының әрқайсысын сипаттады. Оқушылар аз танымал анекдоттармен және жазушы жазған қысқа күлкілі әңгімелермен танысты. Жазушының ұлы Қасым-Жомарт Тоқаевтың туған-туыстарына жазған хаттарына сүйіспеншілік пен жылулық сезімі ерекше таң қалдырды. Оқушылар “Жалғызқара” кітабымен таныса отырып детектив жанрының “атасы” Кемел Тоқаевтың өмірі мен шығармашылығына қызығұшылық танытты.